នៅពេលដែលគ្រប់គ្នាបានឃើញផ្លែឈើទាំងនេះ មានពណ៌ស្រស់ឆើតប្លែកពីផ្លែឈើធម្មតា អ្នកប្រហែលជាគិតថា វាជាការកាត់ត ប៉ុន្តែមិនមែនទេ ព្រោះនេះគឺជាផ្លែឈើពិត ហើយវាពិតជាមាន គ្រាន់តែវាមានទៅតាមតំបន់ និងប្រទេសផ្សេងៗតែប៉ុណ្ណោះ។

១. ទុរេនក្រហម

អ្នកដែលចូលចិត្តហូបផ្លែទុរេន ប្រហែលជាភ្ញាក់ផ្អើលដែលដឹងថាមានទុរេនក្រហមមួយប្រភេទនៅលើពិភពលោក ដែលយើងមិនដែលបរិភោគទាល់តែសោះ។ តាមពិតមានទុរេន ២៧ ប្រភេទខុសៗគ្នានៅក្នុងព្រៃ ហើយមួយក្នុងចំណោមនោះក៏មានទុរេនពណ៌ក្រហម ហើយសម្បកខាងក្រៅគឺមានរូបរាងដូចទុរេនសាច់លឿងដែរ។

ពូជទុរេនដែលមានរសជាតិឈ្ងុយឆ្ងាញ់នេះកម្រមានណាស់ ហើយវាដុះតែនៅក្នុងព្រៃសាបា នៃប្រទេសម៉ាឡេស៊ីតែប៉ុណ្ណោះ។ សាច់របស់វាគឺស្តើង និងមិនសូវក្រៀមដូចទុរេនលឿងទេ។ ទោះយ៉ាងណាក៏ដោយ រសជាតិរបស់វាគឺមិនសូវជាដិតខ្លាំងដូចទុរេនសាច់លឿងទេ ប៉ុន្តែក្លិនរបស់វា គឺមានលក្ខណៈឆួលខ្លាំង ។

២. ទុរេនឥន្ធនូ

តាមពិតទុរេនឥន្ធនូមិនមាន ៧ ពណ៌ដូចឥន្ធនូទេ ប៉ុន្តែវាជាការរួមផ្សំពណ៌ក្រហម ពណ៌ផ្កាឈូក ទឹកក្រូច និងលឿង។ នេះមិនមែនជាពូជទុរេនដែលលូតលាស់តាមធម្មជាតិទេ ប៉ុន្តែវាជាលទ្ធផលនៃដំណើរការបង្កាត់ពូជរវាងផ្លែទុរេន ៣ ប្រភេទខុសៗគ្នានៅក្នុងសួនច្បារជាច្រើននៅ Banyuwangi - កោះជ្វាខាងកើត - ឥណ្ឌូនេស៊ី។

ទុរេនប្រភេទនេះមើលទៅដូចជា ទុរេនលឿងធម្មតានៅខាងក្រៅ គ្រាន់តែសាច់ខាងក្នុងមានការលាយចម្រុះពណ៌ប៉ុណ្ណោះ។ សាច់របស់វារអិលក្រាស់ មានរសជាតិឈ្ងុយឆ្ងាញ់ និងផុយស្រួយហើយក៏ឆ្ងាញ់ជាងទុរេនធម្មតាបន្តិច។

៣. សាវម៉ាវសាច់ពណ៌លឿង

នេះគឺជាដើមសាវម៉ាវព្រៃ ដែលដុះនៅក្នុងព្រៃចាស់នៃតំបន់ខ្ពង់រាបកណ្តាល ដែលត្រូវបានគេស្គាល់ជាទូទៅថាជាសាវម៉ាវព្រៃ។ រូបរាងវាខាងក្រៅ មើលទៅដូចជាសាវម៉ាវយើងធម្មតាដែរ គ្រាន់តែសាច់ខាងក្នុងមានសភាពលឿង ប្រៀបដូចជាពងមាន់លឿងអ៊ីចឹង។

ផ្លែសាវម៉ាវនេះ មិនមានរសជាតិផ្អែមខ្លាំងទេ ផ្ទុយទៅវិញវាជារសជាតិជូរចម្លែក។ ដូច្នេះមនុស្សភាគច្រើនចូលចិត្តញុំាវាចុចជាមួយនឹងអំបិលម្ទេស ដើម្បីបន្ថែមរសជាតិ។

៤. ស្រកានាគសម្បកលឿង

មានដើមកំណើតមកពីអេក្វាឌ័រ និងកូឡុំប៊ី ផ្លែស្រកានាគនេះមានសាច់ពណ៌ស តែសម្បកលឿង និងមានរូបរាងតូចជាងផ្លែស្រកានាគសម្បកក្រហម ដែលយើងធ្លាប់ឃើញ។ នៅពេលទុំ ផ្លែនេះមានពណ៌លឿងដូចមាសអ៊ីចឹង មានក្លិនឈ្ងុយ និងមានរសជាតិផ្អែមឆ្ងាញ់។ វាត្រូវបានគេចាត់ទុកថាជាផ្លែដ៏ផ្អែមល្ហែម។

រូបរាងរបស់វាគឺ មានភាពចម្លែក មិនគួរឱ្យទាក់ទាញទេ ប៉ុន្តែផ្លែឈើស្រកានាគលឿងនេះ គឺជាផ្លែឈើដែលផ្ដល់អត្ថប្រយោជន៍ជាច្រើនដល់សុខភាពល្អ។ មាតិកាជាតិសរសៃខ្ពស់ គឺល្អសម្រាប់ប្រព័ន្ធរំលាយអាហារ និងរំអិល។ មាតិកាជាតិដែករបស់វា គឺគ្រប់គ្រាន់ដើម្បីជម្រុញការផលិតកោសិកាឈាមក្រហម។ គ្រាប់របស់វាផ្ទុកអាស៊ីតខ្លាញ់អូមេហ្គា ៣ ដែលជួយឱ្យបេះដូងមានសុខភាពល្អ។

ក្រៅពីនេះ ផ្លែឈើនេះក៏មានផ្ទុកនូវប្រូតេអ៊ីន កាល់ស្យូម វីតាមីន A និង C ម៉ាញ៉េស្យូម ផូស្វ័រ ប៉ូតាស្យូម…វាជួយកាត់បន្ថយហានិភ័យនៃជំងឺមហារីក កាត់បន្ថយភាពតានតឹង និងជំងឺទាក់ទងនឹងអាយុផងដែរ។

៥. ទៀបសម្បកស្វាយ

នេះគឺជាទៀប ដែលមានសម្បកពណ៌ស្វាយ វាមានដើមកំណើតនៅប្រទេសឥណ្ឌា។ សាច់របស់វា គឺមានពណ៌ស ដូចផ្លែទៀបធម្មតារបស់យើងដែរ ប៉ុន្តែសម្បករបស់វាមានពណ៌ស្វាយចម្លែក។ ពេលទុំវាមានក្លិនក្រអូបស្រាល ហើយសាច់របស់វាផ្អែមជាងទៀបយើងធម្មតា ពេលខ្លះភ្លក្សរសជាតិដូចអង្កាំ។

ដូចគ្នានឹងផ្លែទៀបទូទៅ គឺជាប្រភពដ៏សម្បូរទៅដោយសារធាតុចិញ្ចឹមដូចជាវីតាមីន A និង C។ ស្លឹករបស់វាមានផ្ទុកសារធាតុដែលជួយដល់បញ្ហារំលាយអាហារ និងឈឺសន្លាក់។ ទោះជាយ៉ាងណាក៏ដោយគ្រាប់ពូជរបស់វាមានជាតិពុល។

លើកលែងតែផ្លែសាវម៉ាវពណ៌លឿងផ្លែឈើទាំង ៤ ខាងលើនេះសុទ្ធតែជាផ្លែឈើបរទេស។ ប្រសិនបើនាំចូលមកប្រទេសយើងតម្លៃរបស់វា គឺមិនថោកនោះឡើយ៕

ប្រភព ៖ Bedtie / ប្រែសម្រួល ៖ Knongsrok